تاریخ کی دھائی

طارق شہزاد چوہدری

chtariqshahzad@gmail.com
،،،

تاریخ کی یہ مصدقہ تاریخ ہے کہ ہے کہ وہ غیر جانب دار اور نیوٹرل نہیں رہتی۔سقراط نے جب زہر کا پیالہ پیا تو ایتھنز کے حکمرانوں نے سکھ کا سانس لیا کہ اْن کے نوجوانوں کو گمراہ کرنے والا منظر سے ہٹادیا گیا، یونان کی اشرافیہ جیت گئی، سقراط کی دانش ہار گئی۔ وقت گزر گیا۔اسکاٹ لینڈ کی جنگ آزادی لڑنے والے دلاور ولیم والس کو جب انگلینڈ کے بادشاہ ایڈورڈ اوّل نے گرفتار کیا تو اْس پر غداری کا مقدمہ قائم کیا، اسے گھوڑوں کے سموں کے ساتھ باندھ کر لندن کی گلیوں میں گھسیٹا گیا اور پھر ناقابل بیان تشدد کے بعد اْسے پھانسی دے کر لاش کے ٹکڑے ٹکڑے کر دیئے گئے۔ اْس وقت کا بادشاہ جیت گیا، ولیم والس ہار گیا۔ وقت گزر گیا۔گلیلیو نے ثابت کیا کہ زمین اور دیگر سیارے سورج کے گرد گھومتے ہیں تو یہ کیتھولک عقائد کی خلاف ورزی تھی، چرچ نے گلیلیو پر کفر کا فتویٰ لگایا اور اسے غیرمعینہ مدت تک کے لئے قید کی سزا سنا دی، یہ سزا 1633میں سنائی گئی، گلیلیو اپنے گھر میں ہی قید رہا اور 1642 میں وہیں اْس کی وفات ہوئی، پادری جیت گئے سائنس ہار گئی۔ وقت گزر گیا۔
جیورڈانو برونو پر بھی چرچ کے عقائد سے انحراف کرنے کا مقدمہ بنا یاگیا، برونو نے اپنے دفاع میں کہا کہ اس کی تحقیق عیسائیت کے عقیدہ سے متصادم نہیں مگر اْس کی بات نہیں سنی گئی اور اسے اپنے نظریات سے مکمل طور پر تائب ہونے کے لئے کہا گیا، برونو نے انکار کر دیا، پوپ نے برونو کو کافر قرار دے دیا، 8فروری1600کو جب اسے فیصلہ پڑھ کر سنایا گیا تو برونو نے تاریخی جملہ کہا ”میں یہ فیصلہ سنتے ہوئے اتنا خوفزدہ نہیں ہوں جتنا تم یہ فیصلہ سناتے ہوئے خوفزدہ ہو۔“برونو کی زبان کاٹ دی گئی اور اسے زندہ جلا دیا گیا۔ پوپ جیت گیا، برونو ہار گیا۔ وقت گزر گیا۔حجاج بن یوسف جب سرزمین مقدس پر اگ کے گولے پھینک رہا تھا تو اْس وقت ابن زبیرؓ نے جوانمردی کی تاریخ رقم کی، انہیں مسلسل ہتھیار پھینکنے کے پیغامات موصول ہوئے مگر آپ نے انکار کردیا، اپنی والدہ حضرت اسماء سے مشورہ کیا، انہوں نے کہا کہ اہل حق اس بات کی فکر نہیں کیا کرتے کہ ان کے پاس کتنے مددگار اور ساتھی ہیں، جاو تنہا لڑو اور اطاعت کا تصور بھی ذہن میں نہ لانا، ابن زبیر نے سفاک حجاج بن یوسف کا مقابلہ کیا اور شہادت نوش فرمائی، حجاج نے آپ کا سر کاٹ کر خلیفہ عبد المالک کو بھجوا دیا اور لاش لٹکا دی، خود حضرت اسماء کے پاس پہنچا اور کہا تم نے بیٹے کا انجام دیکھ لیا، آپ نے جواب دیا ہاں تو نے اس کی دنیا خراب کر دی اور اْس نے تیری عقبیٰ بگاڑ دی۔ حجاج جیت گیا، ابن زبیر ہار گئے۔ وقت گزر گیا۔
ابو جعفر منصور نے کئی مرتبہ امام ابو حنیفہ کو قاضی القضاء بننے کی پیشکش کی مگر آپ نے ہر مرتبہ انکار کیا، ایک موقع پر دونوں کے درمیان تلخی اس قدر بڑھ گئی کہ منصور کھلم کھلا ظلم کرنے پر اتر آیا، اْس نے انہیں بغداد میں دیواریں بنانے کے کام کی نگرانی اور اینٹیں گننے پر مامور کر دیا، مقصد اْن کی ہتک کرنا تھا، بعد ازاں منصور نے امام ابوحنیفہ کو کوڑے مارے اور اذیت ناک قید میں رکھا، بالآخر قید میں ہی انہیں زہر دے کر مروا دیا گیا، سجدے کی حالت میں آپ کا انتقال ہوا، نماز جنازہ میں مجمع کا حال یہ تھا کہ پچاس ہزار لوگ امڈ آئے، چھ مرتبہ نماز جنازہ پڑھی گئی۔ منصور جیت گیا، امام ابو حنیفہ ہار گئے۔ وقت گزر گیا۔تاریخ میں ہار جیت کا فیصلہ طاقت کی بنیاد پر نہیں ہوتا، یونان کی اشرافیہ طاقتور تھی مگر تاریخ نے ثابت کیا کہ سقراط کا سچ زیادہ طاقتور تھا۔ ولیم والس کی دردناک موت کے بعد اس کا نام لیوا بھی نہیں ہونا چاہئے تھا مگر ا?ج ابیرڈین سے لے کر ایڈنبرا تک ولیم والس کے مجسمے اور یادگاریں ہیں، تاریخ میں ولیم والس امر ہو چکا ہے۔ گلیلیو پر کفر کے فتوے لگانے والی چرچ اپنے تمام فتوے واپس لے چکی ہے، رومن کیتھولک چرچ نے ساڑھے تین سو سال بعد تسلیم کیا کہ گلیلیو درست تھا اور اْس وقت کے پادری غلط۔ برونو کو زندہ جلانے والے بھی آج یہ بات مانتے ہیں کہ برونو کا علم اور نظریہ درست تھا اور اسے اذیت ناک موت دینے والے تاریخ کے غلط دوراہے پر کھڑے تھے۔
تاریخ ہندوستان حیدر علی کے جری بیٹے شیر میسور ٹیپو سلطان شہید نے انگریز سامراج کے خلاف پہلی زوردار مزاحمت کی۔مرہٹہ،نظام حیدرآباد، جیسی پڑوسی ریاستیں بھی اس کے مخالف تھیں۔اس کے باوجود اس نے پروانہ غلامی” سبسڈریری” الائینس” قبول کرنے سے انکار کیا۔ اس کے ساتھی میر صادق، غلام علی لنگڑا،اور پورنیا غداری کر گئے۔وہ عین وقت پر انگریز کی گود میں چلے گئے۔ سلطان کے سامنے شکست یقینی تھی۔مگر اس نے ہتھیار نہیں ڈالا۔ لارڈ ویلزلی نے سلطان کو تاریخ کے صفحات پر عبرت کا نشان بنانے میں کوئی کسر نہ چھوڑی۔ہر ظلم اور بربریت کی من گھڑت داستان اس سے وابستہ کی گئی۔اس کی شہادت کے بعد ہر دور میں اس کا نقش مٹایا جاتا رہا،ٹائیگر آف میسور کی دھاڑ کی بازگشت آج بھی لندن کے کوئین وکٹوریا میوزیم میں انگریزوں کو خوف زدہ کرتی ہے۔مگر لارڈ ویلزلی کو خود برطانیہ میں کوئی نہیں جانتا. اس نے اپنے ہم عصر فرانسیسی نیپولین کی طرح انگریزوں کو گرفتاری دے کر تامرگ چھوٹے سے پنجرے میں قید نہیں کاٹی۔اس نے مردانہ وار لڑتے ہوئے جان خالق حقیقی کے سپرد کر دی۔مگر غلامی کا طوق گلے میں نہیں ڈالا۔آج سے ایک سو سال بعد ہم میں سے کوئی بھی زندہ نہیں رہے گا، تاریخ ہمیں روندتی ہوئی ا?گے نکل جائے، آج یہ فیصلہ کرنا مشکل ہے کہ ہم میں سے کون تاریخ کی صحیح سمت میں کھڑا ہے اور کون تاریخ کے غلط دوراہے پر ہے. کون حق کا ساتھی ہے اور کون باطل کے ساتھ کندھا ملائے ہوئے ہے، کون سچائی کا علمبردار ہے اور کون جھوٹ کی ترویج کر رہا ہے، کون دیانت دار ہے اور کون بے ایمان، کون ظالم ہے اور کون مظلوم۔ ہم میں سے ہر کوئی خود کو حق سچ کا راہی کہتا ہے مگر ہم سب جانتے ہیں کہ یہ بات دنیا کا سب سے بڑا جھوٹ ہے، کیونکہ اگر ہر شخص نے حق کا علم تھام لیا ہے تو پھر اس دھرتی سے ظلم اور ناانصافی کو اپنے آپ ختم ہو جانا چاہئے۔ کہیں ہم تاریخ کی غلط سمت میں تو نہیں کھڑے؟ اس سوال کا جواب تلاش کرکے خود کو غلطی پر تسلیم کرنا بڑے ظرف کا کام ہے، جس کا آج شدید فقدان ہے۔ وقت تو گزر ہی جاتا ہے، دیکھنا صرف یہ ہوتا ہے کہ کسی باضمیر نے وہ وقت کیسے گزارا! فصلی بٹیرے ہمیشہ تیار فصل کا رخ کرتے ہیں۔
اب رہی بات تاریخ کی تو تاریخ کی یہ تاریخ ہے کہ وہ اپنے صفحات میں سے جھوٹ کو خود ہی اگل دیتی ہے۔

اپنا تبصرہ بھیجیں